新聞類別
財經
詳情#
【明報專訊】社會愈來愈開明，愈來愈多人對死亡唔再避忌，仲好重視自己嘅身後事，所以喺創業板上市嘅訊通（8082）就食正呢股殯儀熱，喺蘇州買咗個叫名流陵園嘅墓園不特止，仲請咗著名玄學家楊天命做墓園業務顧問添。
今次訊通委任楊天命做墓園業務顧問，訊通會向佢授出1040萬股購股權，行使價係0.198元，約值206萬，為期10年。聽集團主席徐秉辰講，楊師傅今次會幫手將墓園劃分不同區域，列出邊區適合乜八字嘅人安葬，而墓地每平方米就賣2至5萬元人民幣，好多同胞都負擔得起。家香港好多新盤都會改好幾個名，唔知訊通會否學發展商咁，按唔同區域，起番個名咁呢？徐主席仲話嚟緊有預售機制，畀在生嘅人揀定死後嘅屋企，好似係戲院買戲飛咁容易喎，遲啲楊師傅仲會幫徐主席揀個風水靚嘅家族墓位添。
喺香港辦殯儀教育 培訓禮儀師
另外，訊通仲雄心壯志，話要喺香港搞個教育中心，培養殯儀業人才，主要教授屍體處理、殯儀統籌、各種宗教儀式等等，務求提供殯儀一條龍服務，由死嗰刻至到落葬都有人同你安排晒。聽落小琴都覺得幾吸引，一條龍服務又有得揀定墓位已經夠貼心，仲有埋楊師傅指點迷津，唔怕葬錯位，可惜蘇州咁鬼遠，唔係小琴都心思思想揀番個靚位！
回應 (0)
