肌萎生「閃眼挑戰」籌款 剛征服DSE入港大

【明報專訊】去年為ALS（肌萎縮性脊髓側索硬化症）病人籌款嘅「冰桶挑戰（Ice Bucket Challenge）」風靡全球，好多人都爭住淋冰水，仲搞到有啲便利店冇晒袋裝冰賣。Emily發現，嚟緊有人就以「Eyes Blinking Challenge閃眼挑戰」，為脊髓肌肉萎縮症慈善基金病人籌款，發起人正正就係喺本屆文憑試中攞到21分、成功入讀港大嘅肌萎生周佩珊。


效法去年冰桶挑戰

肌萎病人四肢唔靈活，有啲甚至唔郁得，但眼睛可如常轉動，所以佩珊發起「閃眼挑戰」，讓其他人用另一個方式感受肌萎病人。睇番上年嘅冰桶挑戰活動，除咗為美國肌肉萎縮性脊髓側索硬化症協會籌得過億美元外，也為香港肌健協會籌得2600萬，相等於以往捐款嘅百多倍！


咁究竟乜嘢係「閃眼」呢？原來可以根據佩珊所作嘅歌，跟住節奏做出眨左眼、右眼，或者一齊眨嘅動作，自己創作一套眨眼節奏都得㗎！好似之前個冰桶挑戰咁，拍完閃眼片後上載去fb，再挑戰多3個朋友，唔接受挑戰嗰個就可以捐100蚊到基金嘅匯豐銀行戶口002-6-404517，當然又玩又捐錢就最好啦！佩珊已經拍咗一條片上YouTube（https://youtu.be/07qCjDFwiyw），大家不妨上去睇吓佢雙眼幾靈活！