騙案太多 廉署信被當假嘢

【明報專訊】近日經常出現騙案搞到人心惶惶，噚日網上瘋傳一封聲稱廉政公署本月6日發出嘅信，紙上印上「到訪不遇」字句，要求收信人喺辦公時間打電話畀署方，惹來網民質疑真偽。廉署唔評論個別事件，但呼籲市民可以致電24小時熱線2526 6366核實，如果覺得有人冒充廉署人員，可以向署方舉報。據Emily了解，封信係真嘅，唔係騙案。


警派防騙案傳單

近日電話騙案連連，有人扮「中聯辦」、有人扮報館記者，今年頭7個月嘅電話騙案已達2371宗，比去年同期多咗七成。警方早前公布，截至上月28日錄得729宗假冒內地官員及中聯辦嘅電話騙案，噚日再公布上月接獲838宗個案，即係短短3日就增加109宗騙案，而呢7個月嘅案件就涉及1.26億元！


警察同各區撲滅罪行委員會噚日巴士巡遊，並喺街頭派宣傳單張，提醒市民提防電話騙案。警方提醒市民收到可疑來電時保持冷靜，記緊要保護銀行帳號、密碼等個人資料呀。