葉劉曬大腸冇瘜肉 「可繼續長時間服務市民」

【明報專訊】今年65歲嘅新民黨主席葉劉淑儀前日喺facebook大講自己每晚食低劑量嘅阿士匹靈預防直腸癌，噚日再喺fb上載自己嘅大腸內窺鏡檢查照片，再次曬自己幾咁健康，話一粒瘜肉都冇。點知有網民眼利，發現張大腸圖片披露咗葉太嘅身分證號碼呢個重要個人私隱，入夜後葉太察覺呢個問題，刪除咗個post。佢同Emily講今次係班伙計論盡，但佢話唔介意身分證號碼泄露，仲話自己一向冇乜私隱。


網民：想選特首？

葉太喺佢個post中，講到感謝上帝令佢有長期健康同強健體魄，「讓我精力可以在未來日子，繼續長時間服務市民」。有網民就問﹕「咁樣曬自己健康，係唔係想下年去選特首呀？」


葉太話立法會休會後就到醫院做詳細體檢，結果令佢非常滿意，仲詳述體檢結果。佢話血壓大致係100/70，脈搏每分鐘約50下，比正常人稍低，護士話佢擁有「運動員脈搏」。至於「三高」（高血壓、高膽固醇及高血糖），佢話唔使擔心，因為報告顯示指數好「靚仔」。


佢仲透露幫佢照料身體嘅係著名腸臟專家朱健華醫生，已經幫咗佢十幾年；又喺網上公開大腸「絕密」照，不過就經過特別處理，佢解釋係唔會「畫公仔畫出腸」。