稅局郵箱號碼掀假信虛驚 澄清：常用郵箱不止一個

【明報專訊】近期騙徒手法層出不窮，令全港市民警覺大增，有時更變咗杯弓蛇影。唔少人噚日就喺facebook及WhatsApp睇到信息，話有同事近日收到稅務局發出嘅信，信封面印住「稅務局 香港告士打道郵政局郵箱28744號」，但報稅表姓名一欄有埋當事人嘅英文別稱，好似Peter、Mary咁，不過佢嘅身分證係無呢項資料；又有一封信封面為「稅務局 香港告士打道郵政局郵箱29004號」，懷疑有騙徒大膽到連稅務局都敢冒充，所以將詳情上載到社交網站，呢個消息喺網上引起哄動。


Emily就喺WhatsApp收到朋友好心提示，聲稱有一封懷疑冒充稅局發送嘅信，今次由香港告士打道郵政局29006號郵箱寄出。不過稅務局噚日出聲明，澄清話佢哋有用好多唔同郵箱，「使用不同的郵箱作回郵地址，除了常用的郵箱132號，個別人士將報稅表寄回28744、29004及29006號等郵箱，方便將收取的大量報稅表及其他信件作分門別類處理」。


Emily問埋稅務局點解張表會有人哋個英文別稱，對方回覆「若發現姓名有錯漏，可提交身分證副本作佐證，以便局方更正其姓名的正確寫法」。