陳恒鑌收「政協秘書長」詐騙電話 稱畀錢可升常委

【明報專訊】最近成日有電話騙案，日前更有國家級女歌唱家李遠榕被騙約2000萬元，噚日民建聯立法會議員陳恒鑌接受商台節目《在晴朗的一天出發》訪問時自爆，自己係省級政協委員，近日收到來電，對方冒認係內地政協秘書長，話畀錢可以升做政協常委，「佢話畀錢係要『做啲嘢』」，即刻引來主持人嘩然，但陳恒鑌就話自己一向好警覺，「我個人比較唔貪心，所以冇中計」。


陳恒鑌話當時即刻問對方可唔可以傳真張卡片過嚟，留低聯絡，「點知對方就露出狐狸尾巴，即刻收線」。佢覺得如果對方真係政協秘書長，想升自己做政協常委，唔會打個電話升佢咁「兒戲」，「至少約出嚟傾吓偈」。陳恒鑌話對方今次冇留低任何個人資料，所以冇報警，但計劃聽日去廣東見公安廳官員，表達對近日詐騙案愈嚟愈嚴重嘅關注。