「不放棄年輕人」 廠商會3000萬捐大學

【明報專訊】中文大學前校長劉遵義早前撰文大罵學生衝擊港大校委會會議，指有人質疑納稅人係咪應該看顧呢班「被寵壞的小混蛋們」。另一邊廂，廠商會似乎唔係好認同劉教授嘅講法，噚日出新聞稿話未來3年會捐款予各大學。廠商會話佔領行動以至近期港大學生衝擊校委會事件後，雖然有人質疑，香港納稅人嘅錢係咪應該繼續投放喺年輕人身上，但廠商會會長李秀恆就話，佢哋以行動證明，唔會因而放棄年輕人及教育。


廠商會去年慶祝80周年會慶，大手筆捐咗3000萬元畀理大，今次捐款雖然縮咗水，分3年捐3000萬畀各大學，但金額都唔算少。Emily有聽聞，港大學生衝擊校委會事件後，有個別會董亦話唔想捐款畀港大，但廠商會發言人就話，商會會先走訪各大學，睇吓各大學提出有咩適合項目，先至會決定點樣分配3000萬元撥款喎。


李秀恒就話，商會轄下嘅教育委員會曾經討論過港大事件，但認為如果因為一小撮學生嘅行為而停止對教育嘅投入，「有欠理性和公平」。