fb管理員道歉 葉劉讚有承擔

【明報專訊】新民黨主席葉劉淑儀前日喺facebook上載「大腸內窺鏡檢查」照片，證明自己身體健康，但照片就泄露咗葉太身分證號碼，佢fb事後刪咗個post。當大家以為事件告一段落，葉太fb噚日再出post，今次留言者唔係佢，而係「葉劉淑儀FB專頁管理員Eric Chan」，而呢位Eric就話自己處理fb內容時出現嚴重失誤，令葉太個人資料外泄，「本人在此向她鄭重道歉」。


Eric要公開向老闆道歉，惹來網民及政圈熱話，有人替Eric不值，仲留言話「其實，係顧（僱）主問題」，不過，有網民亦話佢做事唔夠留心。


葉太就同Emily講，佢唔係要為疏忽事件搵替死鬼，但就話Eric既然有錯漏，公開道歉係有承擔、負責任嘅表現，仲話任何人都可能做錯事，唔會因單一事件影響對Eric嘅評價，又讚Eric做事都幾主動、有責任感，所以唔會為呢啲事而懲戒。


葉太又話佢搵人管理fb係好正常，又話大部分名人都唔會自己去搞fb，「唔通美國總統會自己去寫fb咩」，當然要搵專人幫手處理。