幸福醫藥抽葉太水 上載「Eric照肺相」

【明報專訊】新民黨主席葉劉淑儀嘅facebook專頁早前上載大腸檢查圖但誤泄自己嘅身分證號碼，之後專頁管理員Eric Chan發帖話出現嚴重失誤而向葉太道歉，結果反而變成葉太公關災難，噚日仲引嚟幸福醫藥同埋自由黨田北俊嘅專頁齊齊抽水。


田少fb管理員「鄭重道歉」

田大少嘅專頁有樣學樣出咗個「道歉帖」，有自稱「田北俊fb專頁管理員田毛毛」嘅人寫話，因為處理一篇帖文太出色，令到田北俊專頁like數激增，對田大少構成極大困擾，所以要鄭重道歉。


呢個帖嘅寫法同格式，幾乎同Eric Chan個道歉帖一樣，難怪唔少網民話田大少抽乾晒啲水啦。


另一邊廂，幸福醫藥都唔執輸，出咗個假扮WhatsApp撮圖，話有個叫「Eric」嘅人畀人照肺，仲有張照肺相，然後管理員喺短訊提佢遮咗個身分證號碼先，「Eric」即話大鑊同埋頭痛未好，管理員就賣廣告咁樣話﹕「頭痛呀？你知要食咩架喇。」