港珠澳橋可如期完工？ CY未答

【明報專訊】特首梁振英61歲生日期間訪問珠海，與珠海市委書記李嘉會面，雖然無論香港同內地官員都曾經話港珠澳大橋難以喺2016年底建成，但李嘉見梁振英時就好樂觀，話明年珠海嗰邊主要嘅工程，應該可以基本建完，可以有一個更好嘅形象或建設成果。李嘉仲「打蛇隨棍上」，話下一步要研究加快推進通關便利。


但話口未完，下晝特首被問到有無信心大橋可以如期完成工程時，就話大橋採取橋隧結合方式，加上考慮環境保護問題，設計同施工上都遇到唔少挑戰要克服，將會盡全速完成大橋建設，無正面答趕唔趕到。特首又大讚港珠澳大橋可以擴闊港人生活空間，有重大戰略意義，大橋通車後，亦可以將本港同珠海間嘅行車時間縮短至1小時，由赤鱲角機場至珠海只需45分鐘，可以伸延赤鱲角為航空樞紐嘅腹地。