基本法展有華叔無馬丁 主辦﹕場地限制 好多內容無法展示

【明報專訊】《文匯報》舉辦中國香港《基本法》頒布25周年大型圖片展，其中一塊展板展出多張基本法草委照片，但有記者發現，展板上部分草委未見。好似民主黨創黨主席李柱銘、《明報》創辦人查良鏞就未見喺展板上出現，已故支聯會前主席司徒華則「榜上有名」。


Emily向嘉賓之一、立法會主席曾鈺成指出問題時，佢都好驚訝，反問﹕「咁奇？唔會吓嘛！真唔真呀？」仲專登入番去場館查究。咁啱特首梁振英送咗本已故國家領導人鄧小平親筆題詞嘅《基本法的誕生》畀佢睇，曾主席就特別同Emily分享書中講法。


曾鈺成驚訝﹕應該一齊有或一齊無

曾主席話，書中名單同時有司徒華同李柱銘個名，但同時亦有個註，註明草委查良鏞同鄺廣傑其後辭職，而司徒華同李柱銘就同時被指從事「與基本法草委身分不符活動，被人大常委停止職務」，所以佢認為，兩人有就應該一齊有、無就一齊無。


Emily亦去咗請教教育局長吳克儉，局長話無留意到李柱銘唔見咗。另一草委譚惠珠話，唔知李柱銘「失蹤」原因，叫Emily問番個機構喎！


展板話活動獲民政事務局同中聯辦「特別支持」，《文匯報》董事長王樹成致辭時話，由於場地限制，好多內容無法展示。但個場係咪細到連李柱銘張相都容納唔到，就不得而知喇。


另外，特首梁振英喺離開圖片展時，遇到民主黨副主席尹兆堅示威，抗議政府調查鉛水工作緩慢，並向進入升降機嘅梁振英掟出一支樽裝水，但無擊中人。