大風吹 獐子島扇貝又走佬

【明報專訊】有時小琴真係覺得，投資A股係要好博學先得，上至天文下至地理都要識，否則隨時輸錢都唔知咩事。例如深圳上市嘅獐子島，若果你唔係一個天文學家，都幾難捕捉到佢啲扇貝幾時又會走咗去。


公司曾經因為「異常凍水流入」令74億粒扇貝「死不見殼」，今次無凍水啦，但有風災喎。公司話，8月6日凌晨獐子島鎮發生「大風氣象災害」，仲拎到長海縣氣象服務中心嘅證明，話風力等級達到13級，用香港嘅標準就係颱風級別。


上次因為凍水蝕咗十幾億人仔，今次公司無講到啲扇貝有無出事，只係強調有買保險。網民估計，啲扇貝恐怕又逃走咗啦。另有部分網民更查證到，當日長海縣嘅風力只有4至5級，咁傳說中嘅13級呢？真係要問返啲扇貝先知啦。


email: piano@mingpao.com

[小琴密語]