左撇子編舞家舞出小眾幸福

【明報專訊】噚日係「國際左撇子日」，係一個專屬慣用左手嘅人嘅節日。全世界只有百分之十嘅人係左撇子，活於「右撇子」為主嘅社會，難免有好多不便。但係身為左撇子嘅本地編舞家藍嘉穎，竟然喺16歲接觸舞蹈後先發現自己與別不同，「點解我會用左手拎道具呢？」26歲嘅佢離家獨處，先發現罐頭刀原來咁難用。


當社會上有人認為左撇子係麻煩、有父母逼左撇子小朋友用右手寫字，嘉穎反而更喜歡成為左撇子，因為佢發現父系嘅親友，每個家庭都有一個左撇子嘅代表，係一個家族記號，佢又發現左撇子適應力特強，改用右手影相、用罐頭刀都無難度，而且左撇子用慣右腦，創作力較強，思想天馬行空，所以先會令佢做到一個有關左撇子嘅舞蹈作品。


喺國際左撇子日，左撇子會邀請親朋好友以左手完成一個小任務以慶祝，而藍嘉穎最想同大家分享嘅任務，就係扮左撇子同你右撇子嘅伴侶手拖手享用晚餐，畀大家知道左撇子唔一定只有不便嘅生活，都有一啲純樸嘅小確幸㗎！