談津爆批內地封鎖消息 大學生上國情班帶定口罩

【明報專訊】暑假過咗大半，除咗做兼職、去旅行，有大學生都會趁機會參加國情班同內地交流團，認識祖國，一班參加咗「未來之星」交流團嘅大學生將於周日（23號）同周四（20號）分別去北京同江蘇考察一星期「補腦」學國情。不過，鄰近北京嘅天津市近日發生危險品倉庫大爆炸，搞到同學仔有啲心慌慌，擔心北京嘅空氣會受污染影響，唔少人都話會帶埋口罩上京。有同學都話有留意津爆，仲話內地封鎖消息及唔畀記者採訪係做得唔好。


今年「未來之星中國國情教育培訓班」同「未來之星從香港出發——江蘇之旅」即將啟航，近200名參加者噚日出席出發禮同簡介會。將會去江蘇嘅珠海學院黃同學話，今年適逢抗戰勝利70周年，希望透過參觀南京大屠殺紀念館了解抗戰歷史。黃同學話有留意天津爆炸事件，認為內地封鎖消息、阻止記者採訪，係做得唔好。


參加為了解中港矛盾 無懼「洗腦」

兩個準備去北京清華大學上國情班嘅同學，都話會帶備口罩。想唔想去天津了解實况？同學話唔可以離團，加上安全至上，所以無咁嘅打算。


有人會話內地交流團係「洗腦團」，將會上京嘅中文大學董同學話，被人話過參加國情班係「赤化」咗，但佢認為正正有中港矛盾，更要親身了解國情。恒生管理學院嘅江同學都話，有同學提醒佢小心被洗腦，但佢笑言有自己思想，無可能咁快就會被洗腦。