梁班子王老五 多咗張雲正 男高官另一半多是主婦

【明報專訊】唔少人都知道，律政司長袁國強係官場中嘅鑽石王老五，過去問責班子中，亦只有袁國強一人係單身官員，不過隨着特首梁振英（CY）撤換兩個局長，前關長張雲正做咗公務員事務局長，王老五高官就多咗一人喇。喺問責班子嘅另一份公開申報中，張雲正並無填上配偶資料。


劉江華老婆「退休前休假」

政府噚日向立法會政制事務委員會提交文件，喺司局長、特首辦主任提交嘅「財務及其他利益登記」，張雲正除咗無物業、無持有公司等外，配偶一欄亦寫上「N/A」。至於民政事務局長劉江華，相信大家都記得佢太太曾經係廉署高層穆斐文，但劉江華申報太太職業就係「退休前休假」，十分均真。而過去兩公婆都打政府工嘅政制及內地事務局長譚志源，就申報做教育局項目主任嘅太太做到8月，唔知係咪咁，所以佢最近就同老婆放長假去旅行呢？食物及衛生局長高永文太太就係婦產科醫生江孟儀；環境局長黃錦星太太原來係建築師；至於商務及經濟發展局長蘇錦樑嘅太太，就係職業治療師。


不過，官員配偶最普遍嘅職業，一定係家庭主婦，好似財政司長曾俊華、特首辦主任邱騰華、運輸及房屋局長張炳良、勞福局長張建宗，都申報另一半係家庭主婦。而政務司長林鄭月娥就無申報老公職業。