水泉澳邨開居民會 張超雄收房署「警告」

【明報專訊】近期發生鉛水事件，唔少議員都好關注，當知道食水出問題，即刻喺屋邨搞居民大會，工黨張超雄都唔例外，今個月11號晚喺水泉澳邨搞居民會，但前兩日佢就收到房屋署信件，話集會未經批准，且佔用緊急車輛通道，「可能引致嚴重後果」，提醒張議員「慎思」。張超雄見到封信就好激氣，喺facebook留言，不滿房署向佢發「警告信」，「房署就急不及待地要告誡我，真有官威！！！」


指未經批准佔緊急車道

件事係咁嘅，張超雄嘅辦事處早前驗水，發現有單位樣本含鉛，佢話打電話畀運房局長及水務署長都無覆，所以聯同區議員丘文俊喺屋邨開居民大會，但房署當時話屋邨無合適地方，而張唔理照開。


丘文俊就同Emily講，其實佢喺7月底都自己搞咗兩場居民會，事後房署都有去信提醒佢，而佢懶理呢啲信，話搞居民會又阻唔到住戶，而屋邨地方咁大，房署用無地方為由唔批准開居民會，簡直多餘。