劉江華晤乳鴿火花四濺 被問見唔見青關會 「係咪想一齊見？」

【明報專訊】新任民政事務局長劉江華（劉華）上任後不停約見唔同政黨青年組織，噚日就喺政府總部附近，見咗民主黨班後起之秀。劉華局長日前見民協成員時，畀人稱呼做垃圾桶，但劉華話會繼續見其他青年團體。民主黨副主席羅健熙就挑機問，局長遲啲會唔會見青年關愛協會呢？劉華反應好快，即刻反問羅健熙係咪想安排青關會同民主黨一齊見。青關會係成日喺街頭反法輪功嘅組織，兩個人見面未入正題，閒談已扯到青關會，已見火花。


笑語羅健熙唔使做地區工作

劉江華地區經驗豐富，喺會面嘅餐廳一見到班「乳鴒」，就好關心佢哋嘅地區工作，仲問點解未見到民主黨南區區議員區諾軒？區諾軒嘅拍檔羅健熙就解釋，話拍檔遲到，係因為喺南區做緊地區工作。局長就笑笑口話，可能係羅健熙喺地區好有信心，所以可以甩身唔使做。唔知呢番話係讚羅健熙定係彈區諾軒？


羅健熙會面後話，有同局長反映政府由上至下各諮詢層面都愈來愈偏頗，建議政府要多渠道吸納同接受青年意見。佢哋又要求善用區議會撥款、改革地方行政架構，同打擊圍標行為等。佢話局長都係聽多，無乜評論，而感覺上局長對區議會事務比較熟書，其他就未係太熟嘞。


噚日參與會面嘅官員仲有民政局副局長許曉暉、政治助理徐英偉，民主黨就有尹兆堅、許智峯、區鎮樺同沈運華等。


徐英偉會後上載照片，話期待下次就住個別政策，同民主黨再有更加深入嘅討論。