16%股東反對盧寵茂任亞倫董事

【明報專訊】噚日有隻工業股亞倫國際（0684）開股東會，呢間公司一向較受關注嘅原因，就係屬於「股壇長毛」David Webb愛股，家David Webb仲揸緊3700幾萬股，佔11%權益，係公司主要股東之一。


不過咁，噚日股東會原本只係走走流程，大部分議案都幾乎100%贊成通過，但係响重選董事方面就有少少意外，竟然有16%反對盧寵茂連任非執董，計落有成3800幾萬股，如果大家心水清應該記得，盧寵茂就係上月底港大校委會會議混亂期間，話隻腳受傷跌落地嗰位校務委員，唔知係咪因為佢嘅「疑似插水」，引起某啲股東不滿，所以唔想佢連任而投下反對票呢？話時話，响嗰3800幾萬股嘅反對票當中，唔知揸住3700幾萬股嘅David Webb又有冇份呢？

[小琴密語]