終院「歸位」 9•7重返舊立會 司法機構改標誌 彰顯獨立

【明報專訊】終審法院「歸位」，返去有103年歷史嘅中環原最高法院大樓，決定9月7日（周一）「喬遷啟用」，喺蒙眼正義女神下審案，而司法機構因而改埋標誌，用埋終審法院大樓嘅圖案。佢哋話個標誌可突顯個機構嘅獨立性，令市民更容易識別司法機構唔係政府行政機關一部分。司法機構發言人話，個新標誌用藍色，反映司法機構嘅嚴肅同莊嚴，繼續維持公開公正。


昔日最高法院大樓 曾審「三狼案」

其實，喺中環昃臣道8號嘅「新」終審法院大樓唔算新，因為103年前嘅1912年大樓落成時，就係一個法庭，由1912年至1984年係香港最高法院大樓，香港好多大案如最後一單判死刑嘅案件「三狼案」都喺呢度審。1984年後高等法院搬咗去金鐘，大樓就用咗嚟做立法會（前稱立法局）會議大樓。到幾年前立法會有新大樓，呢座歷史建築物又可以用番嚟做法庭，幾個終審大法官9月7日就開始喺新法庭返工喇。


終院網站噚日仲新增咗新大樓幅走廊相，又加咗大樓兩個法庭嘅平面圖（其中一個見圖），發言人話新網站會一直更新資料。Emily問幾時先有得入去睇，發言人話遲啲會安排畀傳媒，佢嘅語氣似乎比Emily仲興奮。