照顧九旬至親 張雲正陪阿媽住400呎

【明報專訊】政府早前公開問責官員嘅利益申報，新任公務員事務局長張雲正，報稱無物業、無持有公司，更係王老五。近日選民登記冊可以公開查閱，有人發現原來過去擔任屬首長級第6級、月薪逾23萬，家升做局長人工超過30萬嘅張雲正，至今仍然住喺香港仔中心一個約400呎嘅單位，單位由一名女士持有，唔通張雲正都被人「種票」？


住香港仔中心

非也！有同張雲正友好嘅政圈人士同Emily講，張雲正的確係住喺香港仔中心，皆因佢係一名孝順仔，為咗照顧年逾90歲嘅張媽媽，一直同阿媽同住，未有因為自己搵到錢就搬大屋，留低阿媽做獨居老人。


有時搭巴士返屋企

Emily聽聞，張雲正除咗孝順，生活都好簡單，雖然每個月搵唔少，要住靚屋、揸靚車綽綽有餘，但即使佢做咗局長、可以有司機接送，但佢有時仍會選擇搭巴士返屋企，呢方面睇嚟，張雲正似乎唔係「離地」官員。