IVE生第五代太陽能車出戰

【明報專訊】環保科技係大勢所趨。專業教育學院（IVE）工程學科十幾個學生，用咗大約1年時間，研發出第五代太陽能電動車SOPHIE V，將於今年10月代表香港到澳洲參加兩年一度嘅「世界太陽能車挑戰賽」，上屆港隊首次參賽就取得第4名，今次希望可以進入三甲。


10月往澳洲參加世界賽

隨住距離比賽愈嚟愈近，有份研製SOPHIE V嘅隊員都加緊備戰，喺沙田污水處理廠嘅車道測試。SOPHIE V車身呈流線型，重340公斤，係採用輕巧而堅硬嘅物料製成，成部車鋪設388塊好似階磚咁大嘅太陽能板，時速高達110公里，如無日照用充電，每次充電3.5小時就可行駛250公里，車內並設有1個乘客座位。


修讀電機工程高級文憑、車手之一嘅翟江偉話，為咗減少車身重量，今次改咗好多不必要設備，例如用攝錄儀取代3塊倒後鏡。為咗慳電，車入面無裝冷氣同其他電子設備。


今屆比賽本港將同美國、德國、日本等12支隊伍角逐，車隊會從澳洲北部嘅達爾文港出發，橫越澳洲中部，到達南部嘅阿德萊德市，全程3000公里需要喺6日內完成，每日比賽由朝早8點至下晝5點，隊員只能喺途經嘅草原同沙漠紮營休息，對體能都係一大考驗。