科展奪冠 莫壽增學生成功急凍飲品

【明報專訊】第48屆聯校科學展覽噚日閉幕。科學展主題係季節，參展嘅21間中學要設計發明品解決四季衍生嘅問題。聖公會莫壽增會督中學就發明急速冷藏飲品「Polar Can」（透心涼）產品，等大家可以喺夏日急凍啲飲品消暑，喺科學展攞到全場總冠軍。


透心涼嘅研發團隊係升中五學生，佢哋嘅發明，只需一個防水袋同兩個密實袋，再加上一啲化學粉末。


佢哋將一室溫罐裝汽水放入一個細密實袋，然後用梳打粉、檸檬酸同埋尿素粉，再溝埋加水，製出吸熱溶液，溶液倒入大密實袋內，再將裝咗汽水嘅小密實袋放入大袋，吸熱溶液就會利用傳導原理冷卻汽水。佢哋用330毫升罐裝汽水做測試，10分鐘左右汽水就由26℃降到11℃。


莫壽增同學又話設計意念嚟自夏天去戶外活動，有人攞保溫膠盒裝飲品，拎住咁大嚿嘢唔方便。佢哋話化學粉末冇掂到飲品，唔會污染飲料。實驗又發現，雪藏罐裝同盒裝飲品效果會比膠樽好。


亞軍得主係聖若瑟書院嘅「鈦白甘靴」，發明減少鞋臭同細菌喺鞋內生長，幫用家預防皮膚病。季軍嘅聖保羅書院，同學借大量培養綠藻發電。部分綠藻要特別用不含硫磺嘅養殖液養住，會產生氫氣，而另一樽綠藻就會釋放氧，兩者接駁到質子交換膜，便會以化學作用產生電流。佢哋推論如果用呢個方法為正常3人家庭發電，每年所需綠藻同培養液要320立方米，等同六分之一個標準泳池。


獎勵方面，總冠軍有1萬元，亞軍8000元，季軍6000元。