有話說﹕智能手機送仔女 驚送出禍

【明報專訊】上周發生兩單新聞，睇到Happy Mama「巧京京」。首先係警方搗破兩個專門利用青少年販毒的集團，共拘捕88人，年齡最小只有13歲咋！黑社會成員利用手機交友Apps，隨機「搖一搖」與青少年搭訕，然後以免費吃喝玩樂與青少年混熟，再利用佢哋販運毒品同犯罪。另外，警方近月發現多名淫媒，透過不同手機應用程式，以「搵快錢」作餌誘使青少年「援交」，上周拘捕4男1女。Happy Mama唔少媽咪Friend都打算趁就嚟開學，買部智能手機畀升中嘅仔女，但係都驚送出個禍來！


不法分子用交友Apps誘少年犯罪

Happy Mama同青協青年違法防治中心督導主任陳文浩傾過。佢話不法分子好少明目張膽直接叫青少年進行犯罪行為，會先同佢哋出嚟飲飲食食，減低戒心。混熟後，當佢哋知道青少年有嘢想買，就會話﹕「不如等我幫下你吖，我有個好易搵錢嘅方法……」，利誘青少年犯罪。時下嘅網上社交平台或者交友程式，都令青少年比以前更易認識陌生人，咁唔通真係「斬腳趾、避沙蟲」，索性禁止仔女用智能手機就算？


禁仔女用手機非上策

陳文浩認為，青少年接觸智能手機係大勢所趨。與其禁用，家長倒不如先同仔女打好底；「首先家長畀部手機仔女前，應該同佢地約法三章，有咩做得咩唔做得。不過父母記住要同子女一齊訂規矩，而唔係單向同佢哋講呢樣唔准、嗰樣唔准。因為中學階段嘅青少年已踏入青春期，唔鍾意被訓話。」另外，一家人亦應訂出一個「無手機」時段，每天都有段quality time維繫感情。咁一旦仔女出現咩情况，佢哋都會願意同家人分享。家長亦應培養子女擁有健康的個人愛好，例如打波、畫畫等，咁一來佢哋少咗時間上網，亦會令佢哋喺真實生活中更易結識朋友，唔再需要網上交友。


有唔少父母可能會以為，自己仔女係Band 1學生，又或者來自中產家庭，邊有可能會出事。陳文浩提醒家長，青少年始終入世未深，佢哋嘅「好奇」同「一時貪念」係無關佢讀咩學校或者來自乜家庭背景。所以家長如果真係打算畀部智能手機仔女開學，就記得同佢哋打定底先喇。