「大時代」其實是警號

【明報專訊】在今年復活節過後，股票成交額2000多億元，港交所（0388）的turbo引擎開動，由180元直飈到300元，我曾經亂點鴛鴦，貼中隻港交所，有雜誌稱我為新股神，搞到我去飲茶飛髮，伙頭洗頭仔就問我攞冧巴。


無畀冧巴 間接救了酒樓伙記

我同佢哋講，我連自己老本行都唔掂，要認輸，點夠膽講股票，那些人當然唔信，他們講，所有股票評論員，經濟師都說股市進入大時代，高成交量將會是新常態，係我孤寒唔肯分享股票心得，結果是招呼都差咗，頭都冇洗得咁乾淨。


最後，我同佢哋講，股票市場的確是進入大時代，大時代的特點就是亂，如果唔亂就不能夠被稱為大時代，中國歷史的大時代一定是春秋戰國時代，如果股票界人士以大時代來形容股票市場，就即是話畀各位知今次是大春秋戰國時代，其實是一個警號，他日股市大冧，股票人士可以大聲講，已經發出了警告，各位未能參透內裏的玄機，仍然入市，就與人無尤。


呢個星期日我去飲茶，招呼又好咗，經理話多謝我，幾個月前，他們問極我都唔肯講買什麼股票，就知道有危機，全部同事都沒有買股票，逃過一劫，仲話今日免茶，吓，乜平日要畀茶錢。


今日股市 明日樓市

其實，我是汲取了教訓，我的「細價樓爆煲論」畀全城鬧爆，我叫人小心，他們就愈不小心，所以，如果我叫酒樓同事唔好買股票，他們可能會唱反調，我唔出聲，他們失去明燈，情願唔買，逃過一劫是他們自己的福份，與我無關。


今日，有很多聽我的爆煲論而沒有買樓將我閙爆的人，3個月後，他們的說話會絕對不同，他們當中，有人好似班酒樓伙記對我說聲多謝，我就非常開心，不過，唔講都唔緊要，唔好再鬧我就可以。


link.mingpao.com/25522.htm

紀惠集團行政總裁

[湯文亮 敢說亮話]