許漢忠加盟新創建 年薪逾八球

【明報專訊】新創建（0659）近排對航空業好熱中，2013年底入股首都機場（0694），今年初又宣布收購飛機租賃公司股權，就連請執董，都專程請位「飛機人」。噚日新創建宣布，聘請機管局前總裁許漢忠（圖）擔任執行董事、副行政總裁及執行委員會成員，年薪逾八球，較許生喺機管局嘅基本薪酬高一大截。公告指許漢忠從9月1號開始任職，固定任期為3年，截至明年8月底嘅年度薪酬（包括薪金及花紅）一共810萬。許漢忠喺機管局時基本薪酬432萬，加上花紅就大概600萬。雖然都已經收入不俗，但許漢忠嚿年7月離任之後，佢嘅接任者林天福基本工資比佢高接近200萬，不過許生份新工收入最終都超過返林天福，其實齊齊加人工，點都係皆大歡喜啦!


許漢忠任職機管局前，曾經喺國泰（0293）同港龍擔任多個職務。新創建今次高薪聘一位「飛機人」，係咪接住落嚟會有更多航空業新搞作呢？


[小琴密語]