10個大商場 6個無哺乳室

【明報專訊】食物及衛生局副局長陳肇始近排四處出動，呼籲媽咪餵哺母乳。兒科基金同埋兒科醫學會都好支持，但佢哋做咗個調查發現，公共場所畀媽咪餵哺母乳嘅設施好唔足夠。喺10個面積超過10萬平方呎嘅大型商場，有6個無哺乳室，只於洗手間內設換片枱，當中有部分商場嘅樓面面積達80萬平方呎，但就連一個獨立嘅哺乳室都無，有哺乳室嘅商場只得四成。


兒科基金會主席陳作耘醫生鬧爆商場無哺乳室，話媽咪喺廁所餵哺母乳好唔衛生，佢反問點解香港呢個國際城市嘅BB，要喺廁所食奶？

政府場館少於兩成

調查又發現，政府體育館同埋社區中心只得6％至18%有哺乳室，舉例如小西灣綜合大樓與小西灣體育館係共用一個育嬰間。陳作耘促請政府制訂政策，規管公共設施、商業樓宇提供哺乳室。