立會提問鉛水 有利選戰 黃碧雲或無緣攞分

【明報專訊】立法會內務委員會下星期二召開特別會議，討論鉛水事件。食水含鉛民生攸關，又可以喺地區攞分，議員當然想發言，不過諷刺嘅係，揭發鉛水事件而人氣急升嘅民主黨黃碧雲，好可能無得發問嘞。因為一般而言，內會主席會參考議員過往喺內會特別會議發問次數，去決定議員發言先後次序，但黃碧雲今屆已經發言3次，屬於發問較多嘅議員，所以今次發問機會較低。


民建聯喺鉛水風波中遲起步，又試過驗唔到部分屋邨有鉛水，但後來畀政府驗出含鉛超標。今次民建聯就有可能爭番個頭位，因為民記陳恒鑌之前只係喺內會特別會議發問一次，屬於發問較少議員，相信好大機會向政務司長林鄭月娥直接發問。


民主派方面，只有人民力量陳志全同埋民主黨涂謹申只係發問過一次，力量似乎較弱。至於經常為私樓發聲嘅公民黨郭家麒，就問過兩次，若想提問，都仲有機會畀內會主席梁君彥點中。