憲報署任公布 揭官員閱兵名單

【明報專訊】抗戰勝利70周年，北京下星期四（3號）將會有盛大閱兵儀式，特區亦會有約300人嘅觀禮團。政府到今日仲未公布觀禮團名單，不過由於問責官員出席都會牽涉署任問題，所以噚日政府憲報，都有寫邊啲官員喺2至4號「離港公幹」，就知邊個局長有份上北京閱兵。


憲報所見，2號至4日政務司長林鄭月娥會離港公幹，而勞工及福利局長張建宗屆時會做署理政務司長。至於局長方面，商務及經濟發展局長蘇錦樑、保安局長黎棟國、教育局長吳克儉、發展局長陳茂波、財經事務及庫務局長陳家強屆時亦都唔喺香港，齊齊上京睇閱兵，由副局長署任。


律政司長袁國強、政制及內地事務局長譚志源其實都會去閱兵，不過因為無署任安排，所以憲報就無交代；特首梁振英當然會去北京，相信政府稍後亦會出稿。換句話講，財政司長曾俊華到時就要留喺香港做署理特首，民政事務局長劉江華亦要留低出席本港各項抗戰勝利活動。而張炳良、高永文等局長亦同樣無份，究竟用咩準則決定邊個有得去，例如係CY較友好嘅官員？定係北京親自揀人，Emily就唔知喇。