民記製新手爸媽安全錦囊

【明報專訊】民建聯新一屆婦女事務委員會埋班，主席係葛珮帆（EQ），而委員會都有唔少男士加入，包括委會副主席李家良等。佢哋噚日有新搞作，見早排接連發生幼兒墮樓意外，所以製作咗一份「新手爸媽家居安全錦囊」，話提點一下父母湊仔女知識，例如「廢青」最愛嘅迷你風扇，民建聯就話如果無人看管下，就要避免畀幼兒接觸到，以免手指或舌頭塞咗入風扇。


婦委會又話，有啲家居意外係可以避免嘅，好似最常見係窗口無安裝窗花或者窗花唔記得上鎖等，就有可能釀成墮樓慘劇。呢份錦囊，提醒家長要將窗簾拉繩綁高啲，唔可以靠近牀邊或桌邊；屋企尖硬家具角位要用軟膠將角位套上；衣櫃或雜物櫃櫃門可以加裝拉門鎖扣，或加固櫃身，避免幼兒拉櫃門時塌櫃；BB仔識得翻身就要加倍注意，應該喺嬰兒身體兩邊加上軟枕，以防翻身時貼住被或枕頭而窒息。


EQ率領婦委會成員同傳媒茶敘介紹錦囊，並總結過去一年工作，包括搞過器官捐贈調查、免費乳健檢查活動等。佢哋噚日仲搵咗李家良及EQ助理嘅BB做模特兒，教授湊仔知識。