fb帳戶新功能 可選離世後代理人

【明報專訊】唔少人會喺facebook分享生活點滴，但以往過身嘅人嘅facebook就只可閱讀，唔可以被其他人管理。facebook噚日開放咗一項新功能，畀用戶選擇離世後帳戶嘅代理人（圖），以代為管理帳戶。


當有人通知facebook某人離世後，facebook會將其帳戶設定為「紀念帳戶」，代理人就可以喺已故者嘅timeline發帖，例如通知其他人悼念儀式嘅日期，或表達緬懷之情，亦可以代已故用戶回應交友邀請、更新個人資料相片，用戶亦可以選擇畀代理人下載其喺facebook上分享嘅相片等備份。但代理人唔能夠以已故用戶身分登入紀念帳戶，亦不能夠查閱其私人信息；用戶亦可選擇要求facebook喺佢離世後永久移除帳戶。只要喺「設定」選擇「安全設定」，然後喺最底選擇「代理人」，就可以使用呢個新功能。