公民黨投訴 收回覆 申訴署主動調查斬石牆樹

【明報專訊】早前路政署夤夜突然斬咗般咸道4棵石牆樹，引起唔少迴響，公民黨睇唔過眼，向申訴專員公署投訴路政署斬樹草率、發展局冇按指引保養樹木、民政事務總署事前冇充分通知區議員。公民黨最近收到公署回覆，話署方接連收到相關投訴，初步研究後覺得件事已經變咗公眾議題，決定展開「主動調查」，而唔係就單一個案咁處理，稍後會探討相關部門嘅處理手法係咪有缺失同改善空間。


申訴人之一嘅立法會議員陳家洛同Emily講，除咗公民黨以外，喺被斬石牆樹附近嘅聖士提反里同般咸道一帶都有街坊向公署申訴，覺得政府做得不足，佢聽到近日官員都忙緊準備應付公署調查，估計發展局長陳茂波上周六接受電台訪問都「知衰」，即刻話可以做好啲。陳家洛話公民黨一直支持設立樹木法，令樹木辦有決策權，亦有保育樹木嘅制度。