洪秀柱後援會在港成立

【明報專訊】香港回歸後早已換上五星紅旗、唱《義勇軍進行曲》，但噚日旺角一間酒樓就有人高舉青天白日滿地紅旗，大唱中華民國國歌，原來有一班親台組織、台商成立港澳各界支持洪秀柱後援會，佢哋喺會上高叫「支持洪秀柱，一定靠得住」。


籲在港台胞回鄉投票

後援會噚日喺旺角一間酒樓舉行成立典禮，近200人出席，會長陳之望話成立後援會係想支持國民黨嘅洪秀柱參選台灣總統，並呼籲台商同埋有投票權嘅港澳人士到台灣投票。對於洪秀柱喺民調中一直落後，佢話唔使擔心，因為主要對手、民進黨嘅蔡英文一直只係維持四成左右支持率，佢相信洪秀柱有機會吸納大量中間選民選票。


台灣國民黨中常委劉大貝亦有到場祝賀，佢話見到咁多人支持洪秀柱好感動，形容洪係非常有理念嘅參選人。對於洪秀柱日前喺facebook公布要暫停競選行程，劉大貝話喺選舉過程中，沉澱同思考係十分正常，相信洪秀柱「絕對不會退選」。