宣傳渡海泳 名人齊落水 拳王曹星如畀水考起

【明報專訊】第五屆維港渡海泳10月18日舉行，主辦單位為咗宣傳，香港業餘游泳總會搵咗體育界、演藝界、財商界、飲食界等多個唔同界別嘅名人齊齊「落水」，拍攝一系列水底照，為參與泳手打氣。好似拳王曹星如，今次要「水中作戰」，但原來好打得嘅佢有弱點，就係唔識游水！星如笑言拍攝時要喺水中閉氣，有啲辛苦。另香港消防處龍舟隊七小福、中原地產創辦人施永青等人都被「拉落水」。


今屆渡海泳有2500人參加，比賽會喺下月18日上午開始，從鯉魚門三家村公眾碼頭出發，終點係鰂魚涌公園公眾碼頭，全長1.5公里。大會屆時會喺終點鰂魚涌公園安排嘉年華會，大家可以齊齊玩攤位遊戲。


兩最年長參賽者參與拍攝

兩位分別76歲同73歲嘅最年長男參賽者曹元緒及最年長女參賽者梁宛凝，都一齊參與水底拍攝。梁宛凝話係受到以前爸爸同女兒參加維港泳嘅影響，去年開始仲同屋企人三代一齊參加。


參加過3次渡海泳嘅施永青話，自己喺1970年代年輕時第一次玩渡海泳，當時由九龍游到香港島，係一個挑戰。施永青今次要著西裝喺水底盤腿而坐睇報紙，一啲都唔容易，因為影相時不斷浮上水面，後來攝影師喺佢身上加咗鉛塊，先可以順利拍攝。