話令各界思考 十優港姐﹕欣賞佔中

【明報專訊】喺2009年會考奪10優嘅出爐港姐冠軍麥明詩（Louisa，圖），參選以來受到好大關注，唔少人都想知喺「智慧與美貌」並重嘅港姐口號下， Louisa對社會事務嘅睇法，參選時及得獎後接受訪問都無多談時政嘅佢，喺噚日《南華早報》訪問講時事。Louisa話欣賞佔中呢場運動，因這令到各界思考（I appreciated the movement because it really made us think），亦反映到港人對社會嘅熱情。


指冇政策可滿足所有人

讀書時講過想做特首嘅Louisa，喺訪問中就講到，如果佢係特首，一定要令房屋可以係市民承擔到嘅，23歲嘅佢都好明白現今年輕人關心議題。Louisa話其實唔會有一個政策令到所有人都開心，所以呢個咪係做特首嘅困難所在，仲話自己現時無信心做到。


訪問中Louisa提到傳媒有好大影響力，佢去年曾到《星島日報》做4個月實習記者。至於佔中，報道引述Louisa認為佔中對香港有益（beneficial），見到港人對社會嘅熱情，但對有人唔能夠接受唔同嘅聲音感到失望。Louisa話，覺得佔中為香港特別時刻，故有到場，但無明言支持定係反對佔中，只係講由「行動去說明」。