民主黨轉載諷民建聯改圖 羅健熙：心領神會 陳恒鑌話無氣量

【明報專訊】民建聯同民主黨因為選民登記舉報個案，近月不斷隔空開火。民主黨噚日喺facebook上載一張寫有「民建聯.最無恥」嘅可樂罐改圖，仲話「很想要吧？小編真係好想知邊度有得買！」民主黨副主席羅健熙話只係轉載，「網上見到張圖廣傳得好緊要，諗住畀其他網民睇吓，大家心領神會啦」。


可樂罐被改字 網民讚彈不一

不過，近日屢與民主黨駁火嘅民建聯立法會議員陳恒鑌同Emily講，民主黨應該要有氣度，即使意見不同，都要以理服人，佢覺得民主黨上載呢張改圖係「無氣量」，希望民主黨反思吓啦。


網民對此有讚有彈，有人喺民主黨fb留言話「買多D派街坊先得」，但亦有人勸民主黨「做正經嘢啦！你們如拜信民主，怎會容不下其他黨呢？」

兩大黨近期幾多火頭，羅健熙同Emily講，民建聯鉛水「搶B女」聲嘶力竭，到動議特權法查鉛水時就縮骨；最近喺選民「種票」事件就以偏概全，攞住個別個案抹黑對手，又唔講大部分投訴成立嘅個案，同法官讚上訴人盡公民責任令制度完善，令佢哋好不滿。