新聞類別
財經
詳情#
【明報專訊】屋漏兼逢連夜雨，船遲又遇打頭風！唔好以為小琴講緊內地樓市宏調接二連三，又或者係匯控（0005）「逼宮」後遺症，其實係講緊主場輸畀升班馬嘅利物浦，26年嚟首次跌落降班漩渦之餘，小琴嘅偶像「王子」費蘭度托里斯，仲唔知係咪拉傷腹股溝肌肉，新領隊鶴臣又唔知有無得留低，搞到輸波輸人又輸陣，成為中環「賓架」茶餘飯後最新鮮滾熱辣嘅吹水話題。
班「賓架」日前同小琴傾開時，仲好無陰功咁話，其實輸家仲有一個，之唔係之前高調宣布取代嘉士伯，成為未來4年利物浦球衣贊助商嘅渣打銀行（2888）囉。
贊助盼換名聲 算盤打唔響
渣打舊年9月時特登係香港搞咗個發布會，高調咁宣布會取代做咗贊助利物浦球衣18年嘅嘉士伯，希望透過贊助一併打響渣打喺亞洲名堂咁話，傳聞4年嘅贊助費大約8000萬鎊，即係差唔多10億港元，雖然數目對1年賺超過200億嘅渣打黎講「濕濕碎」，亦只係相當於於利物浦對阿仙奴嘅全球電視廣告開支，不過若然利物浦降班就唔同講法，分分鐘有反效果。
紅軍26年首陷降班漩渦
咩為之反效果？小琴幾個男性友人睇完星期日晚場波之後，即刻「面書」留言，炮轟利物浦踼得差，仲話唔知好唔好著新買嘅波衫，差在未賴渣打陀衰家咁滯。
咁又係嘅，利物浦開季至今只係7戰1勝3和攞得6分，排係尾3，跌落護級漩渦，一個唔覺意好似紐卡素咁，降落英冠咁醜死人。上個月仲傳緊內地商人有意買起利物浦，唔知渣打會唔會幫手做融資，等利物浦換個新班主，再大灑金錢買返啲球星，務求利物浦可以繼續成為「Big Four」！
報料電郵﹕piano@mingpao.com
回應 (0)
