京官解黃光裕「獄中」發功之謎

【明報專訊】國美（0493）大股東黃光裕，雖然已成階下囚，但近期佢家族陣營，同國美主席陳曉陣營大鬥法，頗有運籌帷幄之勢。小琴有唔少朋友都問，點解黃光裕坐緊監，仲可以做到咁多嘢？呢個疑問終於北京官方人員解開。

羈押看守所 可簽文件

據中國之聲《全球華語廣播網》報道，黃光裕目前依然羈押喺看守所裏，尚未移送監獄服刑，喺國美近期新舊管理層大鬥法，黃光裕雖然失去人身自由，但依然可以喺看守所行使股權、簽署公司文件，指點江山。

報道引述北京市高級人民法院刑二庭副庭長王海虹話，法院考慮到國美公司實際經營情况，容許黃光裕行使以上權力嘅申請，但係黃光裕簽署文件有嚴格監督機制，對簽署有全程錄像。

王海紅又話，在押犯人企業家喺看守所內簽署文件，以前肯定唔畀，但今次通融有利於國美正常運轉，同時亦反映法機關服務型意識，正在強化緊。

今次王海虹嘅說法，應該係首次有內地司法當局負責人，親口講出黃光裕嘅操作過程。不過，有評論質疑，黃光裕係因為企業家嘅身分，先至享受到呢種特權，只有做到咗一視同仁，先係真正法制進步。