利嘉閣經紀 請睇戲做善事

【明報專訊】中原集團旗下嘅利嘉閣地產，前線地產經紀平時要力谷佣金達公司指標之餘，原來公司方面都畀佢哋有「回氣」機會，仲可以同時做善事；因為公司旗下05年成立嘅「利嘉閣藍色力量慈善會」（簡稱藍善會），今年作為第4次嘅「慈善電影欣賞會」噚晚舉行，並已幫助為解決兒童語言障礙嘅「庭恩兒童中心（Benji's Centre）」，籌得4萬元善款。

利嘉閣地產公關大姐Helle話，今次電影《華爾街金融大鱷》戲票限額270張，由前線員工購買，邀請朋友或發展商友好等於噚晚欣賞，並已籌得共4萬元善款。

藍善會累積過去多次籌款活動，已為呢間非牟利機構籌得接近10萬元經費，為有言語障礙嘅兒童提供適當治療，讓佢哋能夠積極融入社會，令佢哋嘅家庭再次充滿笑聲。