香港公園溫室賞「多肉植物」

【明報專訊】除咗春夏，冬季亦係賞花日子，由於部分「肉質植物」喺冬天開花，特別適合喺冬天觀賞。香港公園霍士傑溫室展覽廳今日起舉行「肉質植物展覽」，畀市民一睹肉質植物嘅豐腴形態。


肉質植物嘅根、莖或葉片特別肥大，可以儲存大量水分，特別耐旱，所以又稱為「多肉植物」，仙人掌都屬於呢類植物。根據康文署推介，今次展覽其中一種肉質植物「家樂花」，由於花期長達半年而且顏色豐富，故有「長壽花」之稱；另一種「筒葉花月」，葉尖呈圓形喇叭狀，所以有「吸財樹」之名。展覽由今日起至下年1月31日，每日早上9時至下午5時免費入場。