黃進達添丁 個名唔叫光亞

【明報專訊】35歲嘅康泰旅行社董事總經理黃進達（Jason，圖）雙喜臨門，除咗啱啱獲選為旅議會主席，原來呢個月仲做埋爸爸。根據黃家族譜，B仔排到要用個「光」字，咁叫黃光乜好呢？Jason話仲諗緊，總之唔叫光亞啦，話承受唔起呢個名。


Jason子承父業，他日想唔想個仔都繼續接手？佢好鬼馬咁話，驚個仔聽到會喊喎。當年黃士心掟Jason入公司，由暑期工開始，咩都做吓，帶過團返鄉下潮州，又帶團去過歐洲。喺理大讀旅遊嘅Jason本來想喺外邊闖下，但畢業時適逢SARS，就梗係要返公司幫手。佢話第時會學番老竇嗰招，掟個仔返公司做吓，開心咪繼續做囉。


初為人父，Jason話心態唔同咗，一做完嘢就歸心似箭，家陣三分之一時間返公司，三分一做旅議會，三分一留畀屋企，否則屋企個老闆，即係佢老婆唔放過佢喎。