海洋公園有喜 15企鵝B出世

【明報專訊】海洋公園又有新成員！最近兩個月海洋公園有15隻企鵝BB出世，好快就可以同大家見面喇。眾所周知，企鵝家鄉喺南極而唔係北極，15隻企鵝BB住喺海洋公園嘅「南極奇觀」，聖誕期間大家就可以見到佢哋。


15隻巴布亞企鵝BB，分別喺今個月同上個月出世，家由企鵝爸爸媽媽喺巢裏面悉心照料。巴布亞企鵝一般會喺出世後60天左右換毛，到時企鵝爸爸媽媽就會將仔女趕出鳥巢，等佢哋學獨立生活，預計明年2月佢哋就會換上一身防水羽毛，可以落水喇！


另外，今年9月海洋公園都有條印度太平洋樽鼻海豚出世，呢條小海豚Rati已經逐漸開始識探索周圍嘅環境，接觸其他海豚，不時仲會主動撩護理員玩。家陣住喺海洋公園海洋哺乳動物繁殖及研究中心嘅Rati由母親Rita餵哺，預計3年後先會慢慢斷奶。