港商廈租貴 厚樸也嚇怕

【明報專訊】香港寸金呎土已經唔係新聞，但連內地最大私募基金、由前高盛高華董事長方風雷打骰嘅厚樸投資，都話租唔起香港寫字樓，睇嚟貴租唔單止扼殺小商戶，仲開始損害香港國際金融中心地位添喇。

核心商廈租金 貴過倫敦東京

話說小琴噚日去咗3隻新股嘅上市儀式湊熱鬧，永暉焦煤（1733）股東之一的厚樸管理層，都畀面出席。小琴同厚樸合伙人崔桂勇閒聊，見佢哋響新加坡同北京都有office，就問崔生幾時响香港開番個辦事處，點知崔桂勇話「香港租金太貴，我們沒錢租不起，等我們有錢，再來開吧。」

呢番說話由厚樸話事人講出嚟，小琴即時「O晒嘴」，猶記得厚樸舊年一口氣接晒英國皇家蘇格蘭銀行（RBS） 配售既中國銀行（3988）30幾億股，盛惠50幾億銀，一家財力咁雄厚嘅私募基金都話租唔起香港寫字樓，都咪話唔誇張。

雖然崔桂勇呢番話講笑居多，但香港寫字樓的確貴租，高力國際調查就顯示，今年上半年香港核心區租金全球最貴，每年呎租要成161.42美元，倫敦同東京都跟喺香港後面咋。

近年本港社會每逢有啲爭議性事情發生，建制派動輒都話損害香港國際金融中心地位，唔知香港租金貴到得番跨國投行至租得起，建制派又會唔會建議煲呔曾，響周三個施政報告度搞搞佢呢？

報料電郵﹕piano@mingpao.com