澳門開騷被歌迷讚靚仔 安仔興奮﹕包住棉被唱都抵

【明報專訊】許志安前晚於澳門威尼斯人金光綜藝館舉行演唱會，與同在澳門開騷的黎明打對台。安仔以多個新造型亮相，其中一襲黑色透視裝大騷胸肌，還有穿皮褸獻唱。他笑說﹕「前幾日試衫見到有皮褸，又有件好似棉被咁厚嘅衫，但現在只係7月，幫我搞衫嘅工作人員話，fashion就係咁，夏天著冬天衫，冬天就著背心。」台下歌迷大讚他靚仔。安仔說﹕「就係你哋呢句，我真係包住張棉被唱都抵啦！」引來全場笑聲。


被感動流男兒淚

下月49歲生日的安仔，獲大會提早為他慶祝。嘉賓車婉婉出場跟他合唱《會過去的》及《教我如何不愛他》後說﹕「我受人所託，畀啲嘢你。」安仔有點愕然，得知是生日蛋糕，在婉婉陪同下切蛋糕及許願。他透露生日願望﹕「我願望好簡單，係想部耳機唔好壞。」原來他前晚出場時耳機已經失靈，更換後仍有問題，影響到他唱歌，結果換到第3部才無事。不過他見到歌迷熱烈反應，唱到最後一首歌《一步一生》時，他感動流下男兒淚。


文﹕娛樂組