吳若希佗B搵奶粉錢 輕鬆袋6位數

【明報專訊】懷孕4個多月的吳若希，現與男友Alex一起住在澳門，雖然有家底不俗的富二代Alex寵愛，不過她近期頻回港搵奶粉錢，近期的懷孕星媽中，她與Angelababy及周汶錡吸金力最強，三人帶埋「BB」出席活動，酬勞亦有得加。據知吳若希昨日出席活動兼唱歌就輕鬆袋6位數，在內地非常吃香的Angelababy出商演酬勞達50萬，周汶錡更加密食當三番，BB未出世已經好腳頭。


吳若希昨日聯同許廷鏗到銅鑼灣出席商場聖誕活動，兩人先後出台獻唱，穿鬆身裙的吳若希懷孕後首度公開唱歌，表現輕鬆，席間不時摸着大肚，一臉幸福的模樣。兩人又跟粉絲一齊玩遊戲，示範為玩具公仔冲涼、餵奶及換尿片，實習做個好爸媽。吳若希指自己從小已幫媽媽照顧弟弟，故對育嬰細節非常熟練，反而許廷鏗有少少雞手鴨腳。


笑許廷鏗條腰一樣32吋粗

現已搬到澳門跟男友同住兼養胎的吳若希表示，每逢節日仍會返港探家人，想不到懷孕4個月仍有妊娠反應，她說﹕「我搭船返港出席這個活動，嘔吐得很誇張。」不過出席一個活動就穩袋6位數字，又有專人照顧，都算掙得舒服，所以懷孕後已接了3個商演活動，若不是太辛苦及自己不會太論盡，都會繼續返港演出。


許廷鏗指吳若希現時的身形不似懷孕，吳若希即自爆﹕「我現在32吋腰，跟你一樣啦！」許廷鏗笑言不知道自己有幾多吋腰，但在不久的將來終於可以瘦過吳若希。


去日本旅行 買BB用品

吳若希又透露剛與朋友到過東京旅行4天，在飲食上好節制，望住朋友歎蟹和魚生，自己只食拉麵，她說﹕「好彩我本身不食好多肉，醫生說所有煮熟的食物都可以食，但我懷孕後無過分食得太誇張。」可有擔心日本有輻射影響胎兒，男朋友事前無阻止？她說﹕「他無阻止，我睇過新聞說香港輻射都好高，應該無事的，我過去買BB用品，又買了些禮物仔回來，送了個手袋給未來奶奶，她好開心呀！」


可會參與無綫《勁歌金曲頒獎禮》？吳若希說﹕「我怕大肚著晚裝不靚，不想太辛苦，但會睇公司安排，有需要就出席。」許廷鏗聽聞今年勁歌頒獎禮以演唱會、派對形式，好希望跟吳若希共享。


有需要會出席勁歌頒獎禮

提到商台《叱咤頒獎禮》將轉播權給ViuTV，身為無綫藝人的許廷鏗是否奉旨缺席？他說﹕「無收通知，我不是搞手，去唱歌應該可以的，作為歌手都想出席樂壇盛事。」


記者﹕鍾一虹

攝影﹕梁迺楠

■更多娛樂猛料 ﹕ol.mingpao.com