五糧液總裁唐橋：白酒係中國第5大發明

【明報專訊】大家知唔知中國四大發明係乜呢？咁簡單嘅通識問題，小琴相信連小學生都識答，冇錯，中國四大發明就係指南針、造紙術、火藥同印刷術啦。不過如果話中國有第五大發明嘅話，大家又覺得係乜呢？噚日五糧液嘅總裁唐橋就話咗畀小琴聽，中國第五大發明係中國白酒！

之前用4億元投得央視聯播廣告嘅五糧液，總裁唐橋噚日嚟咗香港出席五糧液旗艦店嘅開幕禮，間舖係由五糧液嘅分銷商銀基集團（0886）開嘅。嗱，個個都知五糧液係出產中國白酒㗎啦，所以喺開幕禮上都放滿各式各樣嘅酒品，現場充斥着一股濃郁嘅白酒香味，小琴淨係聞吓都暈得一陣陣。唔止小琴暈陀陀，就連喺開幕禮上，兩隻醒獅亦表演咗一場飲醉酒戲分，同噚日嘅主題好貼切。

盼似洋酒 走出世界

唐總可能見香港終於開咗第一間五糧液旗艦店，所以都十分興奮。記者問起唐總對白酒市場前景嘅睇法，唐總就講咗一段發人深省嘅說話。佢話中國有四大發明，白酒就稱得上係中國第五大發明，因為中國文化係千絲萬縷，文化就產生咗中國白酒，而中國人就飲番中國生產嘅白酒。聽完係咪覺得唐總講嘢，真係好玄喎。唐總之後仲話，希望憑住五糧液嘅努力，可以改善傳統白酒嘅形象，令到「80後」嘅年輕人可以成為佢哋嘅消費者，同埋中國白酒有朝一日好似洋酒咁，走出世界喎。

報料電郵﹕piano@mingpao.com