農行登廣告 預祝入恒指

【明報專訊】吓，乜農行（1288）染咗藍？噚日小琴畀老友問到口啞啞，唔通恒指成分股變咗有46隻？正當小琴諗住將老友狠狠咁揶揄一番，嘲笑其毫無常識之際，老友叫小琴翻開報紙自己睇吓。係喎，報紙廣告大大隻字寫住「熱烈祝賀中國農業銀行晉身恒生指數成分股」，搞到小琴都好迷茫，農行幾時成為藍籌股？

小琴上返編製恒指成分股嘅恒生指數公司睇返啲資料，發覺廣汽集團（2238）同農行噚日只係第一日晉身國指成分股，45隻恒指成分股冇出冇入喎；再望真啲個廣告，原來係農行自己賀翻農行晉身恒指成分股，但又冇寫明日期。嗯，咁小琴完全明白了，呢個廣告無錯，錯嘅係刊登嘅時間，人家農行應該未上市時已經預咗自己，他朝一日會染藍成為恒指成分股，準備咗呢一份廣告！