新聞類別
財經
詳情#
【明報專訊】春秋航空做廉航起家，連管理層都好慳家，冇私家車坐，同大家一齊迫公車、地鐵，連出差都合住一間房，又帶即食麵、辣醬做糧食，慳得一蚊得一蚊。
董事長王正華噚日見記者，介紹香港飛石家莊嘅新航線，宣傳埋佢哋慳家嘅管理方法。王董話：「錢一半是賺的，一半是省的。」所以佢以身作則，帶頭慳錢。管理層冇專車坐，連「打的」（坐的士）都好少，盡量坐公共交通工具，慳錢快捷。佢哋好多時要出差做嘢，若要坐飛機，都要盡量買打折機票。如果坐火車，都要揀硬卧，王董同樣冇優待。
帶即食麵辣醬公幹
講到出差住宿，就更加慳住使，佢哋主張住宿唔講排場，董事長、行政總裁同其他管理層同房。佢哋曾經去英國公幹，四五人租住一個地下室，比酒店平好多。飲食方面，要尋找平民食堂，食家常菜，不准剩菜，甚至會帶備即食麵、辣醬，醫飽肚又所費無幾。咁撞着有人請食飯，就冇得慳啦？管理層話，會要求人家唔好請食鮑、翅，以免浪費。
王正華由經營旅行社，晉身到首家民營廉價航空公司，佢格外珍惜呢番事業，亦識得欣賞其他廉航經營者。
噚日有出席記者會嘅嘉賓問，佢嘅仔女喺澳洲讀書，幾時可以坐春秋航空去澳洲？王正華就好理性咁話，唔打算搞長途線，反建議對方坐廉航捷星航空（JETSTAR），同樣可以慳錢。
報料電郵﹕piano@mingpao.com
回應 (0)
