國泰10億改商務艙不加價

【明報專訊】國泰航空（0293）呢期旺場，早排盈利破紀錄，加薪、派花紅，噚日公布換制服，又用咗近10億元，整靚商務艙，張椅可以變成一張睡牀，有iPhone同iPod插頭。常務董事史樂山講到明，商務機票唔會加價，預期7至10年可以回本。

出年3月，就可以坐到新商務艙客位，坐去悉尼嘅客人，首先可以享受到。

預計到2012年，所有長途客機都會完成翻新。呢次大翻新，除咗花錢，仲要減少啲位，先可以騰出更多個人空間畀客人，波音777-300ER由57個位減到53位；A330就由41減到39位。

想歎吓呢啲豪華位，要花幾多錢呢？以悉尼為例，商務艙來回機票至少要37,000元；頭等要55,090元，經濟艙就11,430起。咁最多人坐嘅經濟艙，又會點改善呢？史樂山就賣關子，話會繼續做好經濟艙服務，但冇詳細講具體情况。