ICC賓架迫穿梭巴 中環食晏

【明報專訊】九龍站上蓋嘅環球貿易廣場（ICC）啟用冇耐，已成功吸咗幾間原本紮根中環嘅投行過去，包括大摩、德銀同埋瑞信，不過，原來一眾賓架､分析員始終「心繫中環」，經常返去中環食晏，而ICC業主亦即係新地（0016）都好貼心，每日提供多班穿梭巴士每日往來ICC同中環IFC，唔怪得幾間大行都肯搬去對面海。

德銀早一個月剛搬入去ICC，小琴噚日同一位德銀賓架傾開，問吓佢搬咗去新環境慣唔慣，佢就話除咗九龍站「吊腳」啲之外，都冇乜問題。為食嘅小琴就安慰佢話，ICC樓下個圓方都幾多食肆，至少晏晝醫肚有唔少選擇。

大部分客戶喺中環

點知呢位賓架就苦笑話，雖然佢家喺九龍返工，但好多時都會坐ICC提供嘅穿梭巴返中環食晏，原因唔係圓方啲嘢唔啱食，而係大部分客戶都喺中環，所以佢哋經常「穿梭維港」。賓架仲話，每逢午飯時間架穿梭巴士都會爆滿，要早少少落去霸位喎，不過好在架巴士行西隧10分鐘就到IFC，都算好方便。小琴就覺得，一班賓架同分析員好似學生迫校巴嘅情景，諗落都幾好笑。