日企密謀來港上市 組「香港新股俱樂部」

【明報專訊】巴西礦業巨擘淡水河谷的HDR尋日登陸港交所（0388），原來一班日本嘅企業亦心思思，想過來香港上市集資。貿發局下個月中會喺香港繼續搞一年一度的亞洲金融論壇，貿發局助理總裁葉澤恩為咗吸引更多外國企業來港參加論壇，早前飛去日本見當地企業。佢話原來當地有人自發搞咗個Hong Kong IPO Club，即係「香港新股俱樂部」，裏面有十幾間公司，除咗有啲係券商之外，其他都係想過來香港上市嘅企業。

葉澤恩話，日本的IPO近年一片死寂，一年不到20間公司上市，同日本早年的200間差天共地，家陣香港今年都有成100間公司上市。當地銀行又唔係好願放水，所以喺亞洲金融論壇期間，日本官方機構會組織50家企業來港參加論壇之餘，順道同香港嘅銀行傾吓融資安排。

小琴記得90年代都有啲喺香港有業務的日資公司在港上市，最出名的當然係八佰伴。但過去十幾年，日資公司喺香港差唔多絕晒迹，如果真係有日本公司來香港上市，港交所隨時又多條財路。